أنا بخاف من الضلمة ،،

: أنا بخاف من الضلمه

 

دا حقيقي ، انا بخاف من الضلمه ، جايز لحد دلوقتى كمان لسه بخاف منها ، بخاف من الضلمه لما اكون في أوضتي وأسمع أصوات وحركه فى الصاله الضلمه ، بخاف من الضلمه اللى فالأوضه البعيدة ، بخاف من الضلمه اللى ورا الباب المقفول ، وكان أكبر خوفي أنى افتح باب أوضتى وأواجه الوحوش اللى برا في الصاله الواسعه لوحدى ،

 

لما كنت بعطش بالليل كنت أصحي حد من اخواتى عشان يروح يجيبلي كوبايه ميه أشربها من المطبخ ،

بس في مرات محدش كان بيرضى يقوم من النوم فكنت بضطر انى اروح المطبخ لوحدى عشان أشرب ،، كنت أغمض عيني قوي وأجري بسرعه ناحيه المطبخ ،، عشان عيني متروحش ناحيه الصاله و أشوف الوحوش اللى بتعيش فيها بعد ما احنا ندخل ننام ،،،

 

ولما سألت الوالد على اللى بيحصل في البيت بعد مااحنا ننام ؟!

قالى ان في ديب بييجي تحت البيت عشان ياكل الولاد الصغييرين اللى مش بيسمعوا الكلام ومش بيناموا بدري !!

 

!! مسكين يا بابا

 

متعرفش ان الديب اللى بتقول عليه دا بيخاف من الكلب اللى تحت البيت ومتعرفش كمان ان الصاله بتاعتك بالليل بيبقى فيها كائنات مرعبه أكتر من الديب بتاعك ،، كائنات مينفعش تشوفها ،، كائنات مش بتعيش غير فالضلمه ،، الضلمه اللى فالصاله بتاعتنا ،،

 

2 : فكرة الخوف اللى جوانا

 

فكرة الخوف من الضلمه بتكبر جوانا يوم بعد يوم ،،لكنها بتاخد أشكال كتير

الخوف من الباب المقفول ومتعرفش ايه وراه ،الخوف من الصندوق المقفول ، الخوف من الحركة الغريبه المريبه اللى في الشقه اللى فوق رغم اننا عارفين انها مش مسكونه ( بالبنى آدمين على الاقل )

الخوف من اللى احنا منعرفوش

 

3 : الناس أعداء ما يجهلون

 

الخوف من المجهول انت متعرفش ايه اللى ورا الباب المقفول عشان كدا متخيل انك لو فتحته فجأة هتلاقي وراه العفريت اللى هيختفى بسرعه بمجرد ما تفتح النور .. لحظة مش كدا ،، الباب مفيش وراه حاجة بس انت لسه متعرفش دا .. وعشان تعرف لازم تفتح الباب …

 

لكن هل انت عندك الشجاعه الكافيه انك تفتح الباب وتعرف ايه اللى وراه .. ممكن تجيلك لحظة شجاعه وتروح تقف ادام الباب وتفكر لثانيتين انك تفتحه .. وتمد ايدك لـ مقبض الباب و … تفكر تانى ،،،

لو فتحت الباب هتلاقي ايه وراه .. كل انعكاسات عقلك الباطن من خرافات الطفوله بالتخويف من العفاريت اللى بتعيش فـ الضلمه وخيالات قصص الرعب المراهقة اللى ملأت فراغ العقل الباطن بهلوسات غير منطقيه …

 

لو كنت محظوظ هتفهم … انت ليه خايف من الضلمه ؟

انت ليه خايف من الباب المقفول ؟

ليه خايف من الصندوق المقفول ؟

ليه خايف من صوت الخطوات اللى سمعتها فـ الشقه اللى فوق ( اللى مش ساكنه ) أصلا ؟

 

4 : انا ليه خايف أصلا ؟

 

لأنك لسه متعرفش … ممممممم إجابه منطقيه ،، انا فعلا لسه معرفش ،، بس معرفش ايه ؟؟

 

أشرحلك يامحترم :

 

انت متعرفش ايه الوحوش اللى بتعيش في ضلمه الصاله بتاعتك ومتعرفش بيعملوا ايه لما انت بتدخل تنام ،،

 

انت متعرفش ايه اللى جوا الصندوق المقفول اللى انت خايف تفتحه،،

 

انت متعرفش هل فعلا في عفاريت عايشه فى الضلمه ورا الباب المقفول دا ،،

 

ومتعرفش ايه اللى بيمشي بالليل فالشقه اللى فوق ( اللى مش ساكنه ) تمام ،، وليه الأصوات دى مش بتبدأ تسمعها غير لما تبدأ في النوم 

!!!!

 

مش جايز دى كلها تطلع تهيؤات وخيالات مرضيه وتكتشف لما تفتح الباب أو تكشف غطا الصندوق ان كل دا تخيلات في عقلك الباطن عشان تلاقي سبب يمنعك من انك تاخد خطوة وتفتح الباب ؟؟؟

 

ممكن يكون عايز يقنعك ان مش من الشجاعه انك تفتح الباب المقفول اللى وراه عفريت أو انك تفتح عينك وانت ماشي بالليل فى صاله البيت بتاعك وتشوف الوحوش اللى عايشه فيها أو انك تكشف غطا الصندوق اللى فيه تعبان أو أو …. تهيؤك انك سمعت صوت خطوات واحد ماشي في شقه مفيش حد عايش فيها ومش مسكونه ( بني آدمين على الأقل ) ؟؟؟؟؟

 

عقلك بيحاول انه يقنعك وانت بتحاول تقنع نفسك لأن الإنسان أحيانا ..  أحيانا بيحتاج أنه يعطى الفرصه لخياله يكتشف بيه ايه المجهول ؟؟ ايه اللى انا مش شايفه مع انه موجود أدامى دلوقتى ؟؟؟

 

أحيانا بيفشل فى إقناعك ،، وغالبا ما ينتصر .. وبيخليك تجري على أول مخرج هرووب وتنسى بسرعه … اهرب من الواقع بسرعه … و ناااام  ،،،

 

5 : عشااان

 

عشان لما تصحى الصبح وتروح تفتح الباب المقفول مش هتلاقي حاجة وراه .. وتقول دى تهيؤات وتجري تقلب الصندوق المقفول على الأرض ( أصلك خايف من التعبان اللى جواه ) وتروح تجري على الصاله … ممكن تلاقي كل حاجة زى ما سبتها وممكن تلاقي حاجة مش فـ مكانها بعد سهرة الوحوش فـ الصاله طول الليل ،،،

 

أما بالنسبه للصوت اللى فى الشقه اللى فوقك ،،  فهوا وللأسف كان حقيقي وفي حرامي فعلا سرق الشقه اللى مش مسكونه ( بالبني آدمين على الأقل ) وخلاها عالبلاط ….

 

وتقنع نفسك أن دى كلها تهيؤات وخيالات فعلا .. جايز تصيب منها الواقع و جايز لأ ،،،، انت فعلا متعرفش ،، لكن انت جواك حاسس انك وصلت للحقيقه  ،، جايز ،،

 

و بـ الليل … تبدأ رحلتك العكسيه من اليقين إلى الشك …

هل فعلا في وحوش فـ الصاله لما انت بتدخل تنام ؟

هل فى عفاريت عايشه في الضلمه ورا الباب المقفول ؟

ايه الصوت اللى بدأت تسمعه من ورا الباب ؟؟

وتسمع صوت فى الصاله وتفكر انك تقوم تشوف في ايه بيحصل برا ..

لكن عقلك يرجع يقنعك ان دى تهيؤات و اوهام وحتى لو هيا مش أوهام من خيالك المريض فـ الصوت دا أكيد جاى من حفله الوحوش اليوميه في صاله البيت وانت طبعا معندكش الشجاعه الكافيه انك تخرج وتشوفهم ،،،

 

انت محتاج انك تنام كويس عشان لما تصحى الصبح تقدر تشوف الحقيقه على ضوء النهار ،،،

 

6 : ياا أهبل يا بتاع الوحوش

 

وييجي الصبح وتقوم بسرعم عشان تكتشف ان الصوت اللى ورا الباب المقفول هوا صوت الستاير اللى بتطير من هوا الشباك المفتوح ،، وأن الأوضه مفيهاش حد خالص ،، تخرج على الصاله تلاقي فى حاجات مش فـ مكانها  وحاجات مش موجودة أصلا لأنها وبكل بساطه ……. اتسرقت امبارح بالليل وانت بتحاول تقنع نفسك ان فى وحوش في الصاله بتعمل حفله و بتشرب نخب على شرف صاحب الصاله …. يا أهبل (:) يا بتاع الوحوش …

 

 

ومن يومها قررت أنى اتحدى كل مخاوفي .. بقيت كل يوم قبل  ما انام أتأكد ان كل شبابيك البيت مقفوله كويس وأقفل كل أبواب البيت ،، وأسيب نور الصاله مفتوح ،، وكمان قررت أنى انام ف الصاله علطول ،،،

 

لكن كان في سؤال دايما محيرني ومش لاقي له إجابه …

 

لما انا بنام فـ الصاله .. يبقى مين اللى بينام عـ السرير بتاعى كل يوم وبسمع صوت اللحميه بتاعته كأنها السيمفونيه التاسعه لبيتهوفن ؟؟؟

 

بس قلت لنفسي ان كل دى تهيؤات من خيالى وانى هشوف الحقيقه بكرة على ضوء النهار … جايز 

 

 

 

مذكرات مريض نفسي بجنون الارتياب (:)

 

ملحوظة : بعض الجمل بصيغه المخاطب لأن المريض مصاب أيضا بانفصام حاد فى الشخصيه ولكن الطبيب رفض أن يدون ذلك 😦

 

2-2-2013

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s