ياصاحبي في الميدان

في الميدان ياصاحبي تلقى في الميدان
تلقى خلق كتيرة ماشية في الميدان
ماشية ويا شمس طلة عالميدان
شمس حلوة نورها طالع عالميدان
تلقى بسمة طفل سارحة فى الميدان
والشباب عمال بيهتف فى الميدان
والإذاعة والصحافة تيجي تكتب عالميدان
ياميدان العقل فينك انت عندك كام ودان
انت عندك كام لسان
جبت كل الناس منين
كانوا فين من بدري وانت كنت فين ؟
كنت تايه من اللى تايهين من سنين
كنت شايف ظلم ناس متفرعنين
كنت عارف ان فينامظلومين
كنت ساكت زينا كنت مكسور الجبين
كنت مستنى نهارنا يجري لينا من سنين
كنت عارف ان دم الشهدا مسك وروح ملايكة طيبين
كنت عارف ان عسكر مهما يتفرعن ويكبر جاله يوم يبقى السجين
كانوا حكمينا بسلاسل فوق رقابنا مسلسلين
والزنازن مقفولين
والعقول متمنعين
والحناجر مقطوعين
والكلبشات موجودين
والوطن ماشي لـ كمين
يبقى صوت الحق فين ؟
قلت اجري عالميدان
يمكن اسمع صوت غُنايا أو دُعايا
عاللى ظالم واللى سارق واللى قاتل
واللى مانع طفل يضحك واللى حابس شمسي تطلع أو تشقشق فوق سمايا
واللى كاتم جوا قلبي نار بتوجع من بُكايا
كنت وحدي مش لوحدي
كان معايا ألوف كتير
فين دا كله ؟ ! في الميدان
لما فجأة بقينا واحد
كنا مليون بس واحد
كان هتاف الحق يدوي من الحناجر
تسمع الرنه لصوته في السما
فى الميدان
كنا ميت مليون بشر
كانوا ميت مليون جبان
كنا حاسين بالامان
كنا حاسين بعضنا جوه الميدان
كان حاضّنا كلنا كان حايشنا مننا كان فاكرنا إننا ناسيين زمان
أصل الميدان دا حكاية
لازم تتحكي على كل لسان
بس أوعوا تنسوا برضوا للضرورة وللضمان
الميدان شاهد ومشهود عاللى ماتوا
جوه أرضه وفوق جسوره
واللى قاتل لسه عايش جوه قصره أو قصوره
كل ما بحس احس انى مظلوم في البلد دى بجري أصرخ فى الميدان
ياميدان الحق فينك انت عندك كام ودان ودن طين من عجين
أوعي تفتكر انى ناسي أو نسيتك
من يناير وانت عارف انك انت بقيت ضمانى
ياميداني
قلت ايه لأم الشهيد؟
قلت ابنك مات بسببي
كان بيضحك كان بيبكي على اللى صاير في البلد دي
لما كان عايش وساكت سبت حقه يروح وراح
واما اتكلم وطالب قلتله هتروح … وراح
واما مات قلت لأمه انه راح ويا اللى راح
يعنى ايه
اللى مات ملهش حق
ملهش دية
يبقى لأ وألف لأ
احنا جينا تانى جينا وانت
غبت أو مشيت من بين ايدينا عن عينينا
كنت أفكارنا ونسينا
يوم ما تفتكر انك
انت غبت عنا
يبقى أقولك
انى مهما كنت واقف فى مكاني
ببقى متأكد أكيد
إني واقف فوق ترابي
إني واقف في ميداني

إيـهـابـ محمد

#########

Medan

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s