الكلام على مين ؟؟

المدوشين والدوشجية
والموهومين بالتمثيلية
والدفيانين بالبطانية
والعيانين في الحارة ديا
مستنيين الإعلامية
بخبر جديد هيكون رزية
على كل هوا وكل هيا
سمع كلام اسكت سكوت
اسكت يا*** مسمعش صووت
الإعلامية جايا أهيا
احم احم
هنا الإعلامية
أفادت تقارير صحية وداخلية بوليسية
ومجلسية عسكرية بأن الرئيس
حفظه الله
يتمتع بصحة هنية فى المستشفى الدوليه
ويزاول التمارين الرياضية
ويتابع المهام الرئاسية
ويبلغ جموع الشعب تحيته الغالية
وبيقولهم كبروا مخكم من بتوع التحرير وشباب الثورة
دول عيال هفيه وقله مندسة وشوية *** و يعد
الجماهير الوفية
باتخاذ كافة التدابير الحتميه
لإعادة بناء مقرات الحزب الوطنية
والتخلص من شباب التحرير الأقلية
وكل رموز الحرية
وتنفيذ الخطة الديمواقراطيه
وسيادة الحكومة الحراميه
وبراءة النصابين الفورية
ويعد الفلول بمراكز ومناصب حكوميه
وإلى هنا تنتهي النشرة الإخبارية
أشوفكم بعد شوية
==============================================
انا متشائم واعذروني على نطرتى التشاؤمية دى
عشان ………………
عشان انا مش عارف أجاوب على السؤال دا
الشهدا اللى ماتوا دول ! ماتوا ليه ؟
كانوا بيحاربوا إسرائيل مثلا؟؟ !
كانوا بيجاهدوا العدو الغاشم يعنى؟!

كانوا شايلين سلاح ومستخبيين ورا مدرعة وبيضربوا العساكر والظباط؟
كانوا بطلجيه على رأى وزير الداخليه البيه الشملول بتاعنا ؟
بلاش ماتوا ليه
ذنبهم ايه ؟
ذنبه ايه واحد متخرج من كليه كبيرة ومش لاقى شغل ومش عارف يشتغل
ذنبه ايه واحد من كتر القهر الللى شايفه في شغله ودنيته والمعاملة الـ **** من ظباط الداخليه -(قبل الثورة وبعدها )

– أواحد كان ماشي طول عمره جنب الحيط لا دا كان ماشي جوه الحيط وملوش دعوة بالسياسة ولا ليه دعوة باى حاجة فى الدنيا
بس مش عارف يعيش ومش لاقي ياكل ولا يأكل ولاده
ذنبه ايه لما لقى الناس بتقول عيش حرية عداله إجتماعيه انه شارك معاهم
انه حلم انه يلاقى عيش ويحس بالحرية ويعيش فى عداله

مش لاقى على سؤالى إجابه غير ان الشهدا ماتوا عشان احنا نعيش

ممكن يكونوا مش عارفين ايه اللى بيحصل دلوقتي
لكن أكيد انهم متأكدين انهم كانوا دين كبير قوى لحلم كلنا حلمناه لكن احنا بس بس اللى هنجني اللى هما زرعوه … لازم نكون متأكيدن ان مصر دفعت تمن الثورة دى كتير قوى

مش بالفلوس اللى اتسرقت ولا الآثار اللى اتهربت – ( هتيجي علي كام مليار يعنى ) – لكن
بالشباب الللى ماتوا من غير ذنب وهما عارفين ان موتهم مش ببلاش
وهما عارفين ان في غيرهم هيجيبلهم حقهم ومش هيضيعه
لازم نكمل اللى هما بدأووه
عشان ما يجييش يوم نحس انهم راحوا “فطيس” من غير لازمة
لازم نجيب حقنا كله منسبش منه حاجة … ليه نقبل بنص ثورة ؟!

عشان كدا
الجمعة 30 سبتمبر

لازم كلنا نشارك
انزل التحرير
انزل الشارع
اطلع البلكونه
نشارك عشان نجيب حقوقنا
نشارك عشان الشهدا
اللى ماتوا عشان احنا نعيش
حاول ترد لهم الجميل بأى طريقه
خليك فاكر احنا مديونين ليهم بأيه
خليك فاكر مصر مديونه ليهم بايه
حاول تكرمهم في اى مكان
علق صورة للشهدا في بيتك
علقها فى المدرسة
علقها فى الكلية
علقها فى الشغل
اكتب عنه قصيدة شعر
اكتب عنهم عمود فى جريدة
اكتب عنهم قصه

نشارك عشان حقوقنا اللى مش عارفين ناخدها عشان نفهم المجلس اننا مش هنسمح بسرقه ثورتنا مهما كان اننا مستعدين نموت عشان نجيب حقنا

متنسوش حقوقنا لسه مخدنهاش

خرجنا من موضوع الثورة زى ما دخلنا فيه هوجة بهوجة

كان نفسنا تكون الثورة دى عامل محفز ( زى اللى فى الكيميا كدا ) اللى هوا بيتحط على اى حاجة عشان يعمل حاجة أكبر
للأسف احنا معرفناش نستغل الثورة شوية ندوات ومناقشات وبرامج وإعلامين وحاجات كدا مش قد كدا

دلوقتى جاتلنا الفرصة اننا نستغل الثورة بجد

الثورة اللى هتبدأ يوم الجمعة 30 سبتمبر

مطالب بالحق والحرية مطالب لينا كلنامش دستور أولا ولا اى حوارات من
اللى دخلونا فيها النخبة المثقفة اللى سرقت الثورة بعد ما الشباب ضحي بكل حاجة عشان الثورة تنجح

شوية يقولوا الدستور أولا وشوية يقولوا الانتخابات أولا
والجدعان يقولوا الفقراء أولا
وانا وانت أولا …

قاعدين يرغوا ويحورا فى اى كلام وسايبين القاتل عايش بيتنعم فى الدنيا والحرامية هربانين بره البلد والبافى هايخد براءة

يعنى ايه أكتر من 1000 شهيد ومصاب ومش عارفين نحاسب اللى عمل كدا؟؟
دى لو خناقة فى قهوة كان الحكم صدر واتنفذ
وايه وايه وايه
وكلام كتير مقلتش عليه
بس بجد
أنا متفائل

وهتفائل أكتر لما أعرف امتى المجلس الموأر هيمن علينا ويحطلنا مواعيد الانتخابات
امتى هننزل الانتخابات الحرة النزيهة ونشارك فيها من غير ما تتزور ولا يضحك علينا فيها
امتى هختار رئيس جمهورية بجد من اختياري ومن صوتى
مش من التزوير ولا فرض الإراده

امتى هاتخلص من حكم العسكر الللى بقاله أكتر 60 سنه كابس على نفسنا ومرواحنا وجايبلنا الزكام والشلل
امتى هنتخلص من المحاكمتات العسكريه للمدنيين
امتى هشوف المخلوع في السجن ولابس البدله الزرقا أو إنشالله الحمرا يارب
امتى هنجيب حق الشهدا اللى ماتوا
امتى هيبقى في فى مصر
عيش وحريه وكرامه اجتماعيه
امتى هحس ان مفيش فرق بين الوزير والغفير
امتى الكل هيبقى متساوى امام القانون
امتى هجس ان ليا كرامه في بلدي
امتى وامتى وامتى
==============================================
مطالب 30 سبتمبر
1-إلغاء المحاكمات العسكرية للمدنيين
2- تفعيل قانون الغدر
3- إلغاء قانون الطوارئ
4- وضع جدول زمني لتسليم السلطة
5- تطهير النيابة العامة وعزل النائب العام
6- تطهير القضاء واستقلاليته
7- إلغاء وزارة الإعلام
8- رفع حاله الطوارئ
والتى تم مد العمل به خروجا على الاعلان الدستورى من قبل المجلس الاعلى للقوات المسلحه
9- تفعيل قانون العزل السياسي
10 – إقرار حق المصريين فى الخارج بالتصويت فى الانتخابات المقبله
11- حل جهاز الأمن الوطني ( أمن الدوله ) تماما

=========================
من صفحة 6 إبريل
انتوا عايزين ايه ياشعب مصر ؟
كل ما نريده هو .. حقنا فى الحياة بشكل كريم و بحرية و أمان
.. و لقمة عيش نظيفة .. و مستقبل مطمئن لأطفالنا ..
و مساواة بين كل الناس من اكبر مسئول الى اصغر مواطن .. في الحساب و القصاص و الثواب و المكاسب و المعاملة , و داخلية تحمي الناس بلا تهديد
و صوت مسموع في الحق يهز عرش كل مسئول مخطيء او مهمل او متباطيء

و نقولها بكل صراحة و قوة :
هذه حقوق ثابتة لشعبنا … لا فصال فيها … او تفاوض

ليست أحلاما ” ما تحلموش بأكتر من كدة ؟؟؟ ” أو اماني او وعود

و شعبنا سيحصل عليها
.. إن آجلا أو عاجلا
.. و بعز عزيز أو بذل ذليل
==========================

وادي اللى مخليني متفائل
أنا متفائل جدا

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s