حكاية شهيد

في الميدان ياصاحبي قي الميدان

ورا كل باب في ألف حكاية ورواية
من غير سؤال اخترت بابك بلا هداية
كل اللى شفته من عيونك كان موارب
مفيهاش امل مفيهاش حياة
مفيهاش كلام مفيهاش سكوت
كل اللى فيها كان بصيص
من نور ضعيف
كان فجر خايف من الصباح
كان نور معشش في الخفا
كان باب وراه حواديت كتير
مرضيتش تحكي غير قليل
والفجر قرب من بعيد
ساحب وراه نور للحياة
هتعدى من شباك عيونك
شباك غريب شباك وحيد
شباك منور ,, ملوش بيبان
شباك منور فى الحارات
في الجوامع والكنايس
والقهاوى والشوارع
والشيوخ السهرانين
والغلابة الشقيانين
والعيال الشياطين من يناير اللى فات
كان فى كلمة حق نايمة
كان فى نور .. كان فى ظلم
بس مش فاكر حقيقي كان في صوت ولا لأ
كل ما أفتكر انى قادر
ببقى متاكد حقيقى انى يوم ما ييجي فجري
هابقى متأكد .. أكيد
انا قادر . واقدر اجري
ناحية الشمس اللى طالعة
في الميدان من بعيد
وان صوتي مهما كان ضعيف. او بعيد
مش وحيد
ان صوتى رغم موته
كان حياة و كان ميلاد
كان كلام محبوس في صدري
كان صريخ .. مكبوت في قلبي
بس متأكد أكيد .. ان صوت الحق جاى
جاى معاه ضوء النهار
مش معفر أو مترب
لأ , دا صافي من الغبار
اسمحيلي من البداية
ابقى متحامل عليكي
انك انتى من البداية
كنتى تايهة مش لاقيكي
كنتى مدبوحة بسكوتي
كنتى تتمنيلي موتي
أصل موتي فيه حياة
قبل ما بتديني قوتي
بلقى منك روح برااح
بلقي روح من غير حياة
بلقى دمعك في اتجاه
وألقى نفسي في اتجاه
داللى راح في بعدي عنك
مش اعز من اللى راح
من يناير اللى فات
وانتى ساكته مات
شهيد وراه شهيد وانتى ساكته
وانتى معصوبة عينيكي وانتى ساكته
وانتى دابحاني بإيديكي
وانتى ساكته
بس عايزك تعرفي
ان روكي ملك إيدك
انى علشانك سألتك تطلبي مهرك يجيلك
ان لو كان روحي مهرك تأمري طلبك يجيلك
وإني قمت رفضت قهرك وانى قمت مسحت ليلك
وإني قلت لا لظلمك وإني شفت النور فنيلك
وانى عشت عشانك انتى عشت ليكي وعشت منك
بس ما تلومنيش لأنك كنتي ناسياني ونسيتك
بس لما صرختى جيتلك
قلتي بلدك قلت أمي
قلتي روحك قلت أمرك
يعنى لو مفديتكيش بروحي أفدى مين بس إلا انتى
مهما كان الظلم باين
كنتى منى وكنت منك
كنتى عارفه إنى منك
روح وجسم بيحكوا عنك
لما ييجوا يموتوا قالوا
أشهدي بلادي بأنك
درة الدنيابسنك
بنت بضفاير جميلة
تبكي أرضك تبقى جنه
يابلادي يابلادي
انتى جنه انتى منا
#####

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s